අවිවාහක (35) හැවිරිදි කාන්තාවකට ලිංගික අතවර කළ පොලිස් නිලධාරියෙකුට වසර හතක බරපතල වැඩ සහිත සිරදඬුවමක් සහ වින්දිතයාට ලක්ෂ 05ක වන්දියක් ගෙවන ලෙසත් අධිකරණයට රුපියල් 20,000 ක දඩයක් ගෙවන ලෙස නුවරඑළිය මහාධිකරණය තීන්දුවක් ලබාදී තිබේ.
මෙම නඩු තීන්දුව නුවරඑළිය මහාධිකරණ විනිසුරු විරාජ් වීරසූරිය විසින් ඊයේ (13) දින නියම කළේය.
35 හැවිරිදි අවිවාහක කාන්තාවක් මෙලෙස ලිංගික අපයෝජනයට ලක් කර ඇත්තේ කඳපොල හයිෆොරට් පොලිස් ස්ථානයේ පොලිස් කොස්තාපල් වරයෙකු ලෙස නඩු තීන්දුවට ලබාදෙන තෙක්ම සේවය කළ ලක්ෂ්මන් සාලිය බණ්ඩාර වීරසිංහ නැමැත්තා විසිනි.
මෙම සිද්ධිය සම්බන්ධයෙන් 2019 වසරේ නුවරඑළිය මහාධිකරණයේ පොලිස් කොස්තාපල්වරයාට එරෙහිව නඩුවක් ගොනුකර ඇත.
පසුගිය වසර පහක් තිස්සේ විභාග වූ මෙම නඩුවේ සාක්ෂි මත නුවරඑළිය මහාධිකරණයේදී පොලිස් කොස්තාපල් ලක්ෂ්මන් සාලිය බණ්ඩාර වීරසිංහ වරදකරුවීමත් සමග මෙලෙස තීන්දුව ලබාදී තිබේ
